Duke u shprehur në lidhje me Serbinë, Sejdiu tha se ishte vetë ajo që kërkoi shpjegimin juridik në Hagë të vendimit për shpalljen e pavarësisë së Kosovës dhe tani e mori përgjigjen që kërkonte.

“Pas mbështetjes që na dha Gjykata Ndërkombëtare e Drejtësisë, shpresojmë që Kosova të krijojë edhe bonusin e nevojshëm për të qenë edhe anëtare e Organizatës së Kombeve të Bashkuara”.

Kështu është shprehur presidenti i Kosovës, Fatmir Sejdiu, nga Tirana ndërsa ka zhvilluar një takim informal me homologun e tij Bamir Topi, duke mos harruar të përmendë faktin se “Shqipëria mbetet një mbështetëse e madhe e kauzës kosovare dhe se ka bërë një investim të madh në këtë drejtim”.

“Dita e shpalljes së vendimit nga ana e GJND-së, mund të cilësohet si një ditë e rëndësishme për ne, pasi i jepet një mbështetje e fuqishme lirisë dhe drejtësisë njerëzore ndaj atij verdikti të madh të shpallur në 17 shkurt 2008, siç ishte pavarësia e Kosovës”, u shpreh më tej, kreu i shtetit të Kosovës.

Sipas tij, ka ardhur një kohë e re, “në të cilën e ftojmë që edhe Republika e Serbisë të jetë pjesëmarrëse në të mirë të zhvillimit të proceseve integruese të rajonit të Ballkanit”.

Duke u shprehur më tej posaçërisht në lidhje me Serbinë, Sejdiu tha se ishte vetë ajo që kërkoi shpjegimin juridik në Hagë të vendimit për shpalljen e pavarësisë së Kosovës dhe tani e mori përgjigjen që kërkonte.

“Serbët vetë e kërkuan, vendimi tani është dhënë dhe kështu janë këputur të gjitha dyshimet e ngritura prej tyre”, sqaroi Sejdiu për këtë çështje.

Në fund të deklaratës së tij, ai tha se ky është zhvillim i një ere të re, “ku ne mund të pimë një kafe në Tiranë e më pas të kthehemi në Prishtinë”.

“Rrota e historisë nuk mund të ndalet dhe të kthehet pas”, u shpreh Sejdiu në fund.

Topi: GJND shtoi kredibilitetin e Kosovës

“Me presidentin Fatmir Sejdiu, ndamë gëzimin e përbashkët për vendimin e Gjykatës Ndërkombëtare të Drejtësisë, që sanksionoi legjitimitetin e shpalljes së pavarësisë së Kosovës, si një shtet i lirë, sovran dhe i pavarur”.

Kjo ka qenë deklarata e menjëhershme e bërë nga presidenti i Republikës Bamir Topi, pas takimit informal të zhvilluar me homologun e tij kosovar, i cili ka mbërritur në Tiranë për një vizitë dy ditë pas seancës vendimtare të GJND-së mbi gjykimin e pavarësisë së Kosovës.

“Vendimi i GJND-së shton në mënyrë të ndjeshme kredibilitetin e shtetit të ri të Kosovës, duke e ftuar atë drejt një ecje të re, njohjeve të reja dhe drejt një bashkëpunimi më institucional në rajonin e Ballkanit”, tha ai.

“E përgëzoj Sejdiun për rolin e tij, së bashku me lidershipin e politikës në Kosovë për ndryshimin e imazhit të këtij vendi, në këtë periudhë e cila ka qenë vendimtare për zhvillimin e tij”, shtoi më tej kreu i shtetit shqiptar.

Sipas tij, është fakt se gjatë kësaj periudhe ka patur një pulsion të rëndësishëm diplomatik nga Kosova dhe Shqipëria për të njohur zyrtarizimin e Kosovës si shtet i pavarur.

E duke interpretuar sërish impaktin e Gjykatës Ndërkombëtare të Drejtësisë, ai tha ajo mbetet një re në zhvillimin rajonal, ku faktorët ndihen më të çliruar.

“Uroj që edhe Serbia ta bëjnë këtë. Janë ata që e kërkuan këtë dhe janë ata të parët që duhet ta pranojnë vendimin e asaj gjykate. GJND vërtetoi në mënyrë shumë profesionale pavarësinë e Kosovës”, tha Topi. /noa/